A nuk do të dëshironim të gjithë që, në vend të mbllaçisnim diçka gjatë gjithë kohës, trupi ynë të përdorte vetëm dhjamin që kemi ruajtur tashmë?
Një nga arsyet pse nuk ndodh kjo lidhet me dietën tonë. Kur hamë niseshte dhe sheqer të rafinuar, këto ushqime hyjnë në gjak shpejt, duke shkaktuar një ngritje të madhe të nivelit të sheqerit. Pastaj trupi ynë prodhon hormonin e insulinës për ta çuar sheqerin prej gjakut në qeliza. Por me kalimin e kohës sasia e tepërt e insulinës mund t’i bëjë qelizat e muskujve të humbin ndjeshmërinë ndaj këtij hormoni, duke çuar në diabet dhe sëmundje të zemrës. Ndryshe ndodh me qelizat dhjamore, që mbeten gjithmonë të ndjeshme. Nivelet e larta të insulinës e bllokojnë dhjamin në to, ndaj nuk mund ta përdorim këtë dhjamë për energji.
Atëherë, si mund ta ndryshojmë këtë gjendje e ta bëjmë trupin të punojë përsëri më së miri? Fatmirësisht nuk nevojitet ndonjë dietë e skajshme. Hapi i parë është ulja e nivelit të lartë të sheqerit në gjak që sjell rritjen e madhe të insulinës. Përgjegjësja kryesore për këtë nivel të lartë sheqeri është amidoni ose niseshtja, domethënë, ajo lëndë nga e cila janë të përbëra patatja, gruri, orizi, misri e drithëra të tjera. Ndaj mund të heqim dorë tërësisht nga bukë e bardhë, makaronat, petullat, biskotat dhe ëmbëlsirat. Por nuk do të ishte më mirë sikur të gjenim një mënyrë për ta zgjidhur problemin pa i eliminuar plotësisht ato?
Dhe ja tek vjen lajmi i mirë: ka një mënyrë të tillë. Mund t’i pakësojmë ndikimet e shtimit të sheqerit në gjak duke përfituar nga lëndët natyrore në ushqime që ngadalësojnë tretjen e karbohidrateve dhe hyrjen e tyre në gjak. Ja shtatë rregulla për të rënë në peshë duke shfrytëzuar aftësinë e ushqimeve që mund të ngadalësojnë natyrshëm thithjen e sheqerit, kështu që mund të vazhdojmë të hamë ushqimet që duam.
1. Hani diçka të yndyrshme 10-30 minuta para vaktit kryesor
Arsyeja: Do të ndiheni të ngopur më gjatë.
Në dalje të stomakut ka një unazë muskulore, e quajtur valvula pilorike. Ajo rregullon shpejtësinë me të cilën ushqimi del nga stomaku dhe hyn në zorrën e vogël. Mund t’i dërgoni kësaj valvule një mesazh për ta ngadalësuar punën e vet.
Yndyra shkakton një refleks që ngushton valvulën dhe ngadalëson tretjen. Edhe pakëz yndyrë, që mund të sigurohet lehtas nga një grusht arra ose një copë djathë, bën punë, me kusht që ta hani përpara vaktit kryesor.
2. Fillojeni ngrënien me një sallatë
Arsyeja: Ajo thith niseshtenë dhe sheqerin.
Fibra e tretshme e tulit të bimëve si fasulet, karrotat, mollët dhe portokajt, fryhet si një sfungjer në zorrë dhe e thith niseshtenë e sheqerin në hapësirat mes molekulave të saj. E tretshme do të thotë e zbërthyeshme, dhe vërtet, fibra në fund shpërbëhet, duke çliruar glukozë. Megjithatë, kjo kërkon kohë. Glukoza depërton në gjak ngadalë, kështu që trupi ka nevojë më pak për insulinë. Një mënyrë e mirë për të marrë mjaftueshëm fibër është që të hani sallatë mundësisht para e jo pas ngrënies së ushqimeve me amidon.
3. Pini pak uthull
Arsyeja: Ngadalëson kthimin e amidonit në sheqer.
Përmbajtja e lartë e acidit acetik në uthull çaktivizon amilozën, një enzimë që e kthen amidonin në sheqer. (Nuk ka rëndësi se ç’lloj uthulle përdorni.) Meqë vepron vetëm mbi niseshtenë, nuk ka ndikim në thithjen e sheqerit të rafinuar. Me fjalë të tjera, uthulla ndihmon vetëm nëse hani bukë, por jo karamele. Por ka edhe një përfitim tjetër: uthulla gjithashtu rrit ndjeshmërinë e organizmit ndaj insulinës.
Uthulla duhet përdorur në fillim të vaktit. Hidhjani sallatës ose shtirini nja dy lugë prej saj mishit ose perimeve. Uthulla i jep shije ushqimit si kripa.
4. Hani ushqim me proteina
Arsyeja: Nuk do të sekretoni shumë insulinë.
Ka një paradoks: Doni të pakësoni nivelin e insulinës, por, për ta bërë këtë, duhet të sekretoni insulinë më mirë herët se vonë. Është si puna e zjarrfikësve. Sa më shpejt të jepet alarmi, aq më pak zjarrfikës lipsen për të shuar flakët.
Edhe pse proteinat nuk përmbajnë glukozë, ato shkaktojnë një “fazë të parë përgjigjeje të insulinës”, që ndodh aq shpejt, sa e pengon shtimin e sheqerit në gjak më vonë dhe ul sasinë e insulinës që ju nevojitet pas një vakti. Prandaj, hani mish bashkë me makaronat.
5. Hani perime të gatuara lehtë
Arsyeja: Ato treten më ngadalë.
Frutat dhe perimet përmbajnë fibra të tretshme. Megjithatë, zakonisht perimet janë bëjë blockers mira sheqerit, sepse kanë më shumë fibra dhe më pak sheqer.
Por mos i gatuani perimet sa të bëhen si qull. Kjo do t’i mbushte fibrat e tyre të tretshme me ujë e si rrjedhojë ato nuk mund ta përthithin sheqerin dhe amidonin. Gjithashtu, perimet jo fort të gatuara janë më të trasha kur arrijnë në barkun tuaj dhe dihet se copëzat e ushqimit, sa më të mëdha të jenë, aq më shumë kohë duan që të treten, kështu që do të ndiheni të ngopur më të gjatë. Një tjetër këshillë: perimet e pjekura, si p. sh. lulelakra e pjekur, shpesh mund të shërbejnë si zëvendësues të shijshëm të amidonit.